San Martín, California

San Martín se kojtantechan chikitikchin nemi tik ne condado pal Santa Clara tik ne estado pal California tik ne Estados Unidos. San Martín nemi intzajtzalan ne tejtepet – nemi tik ne ne Valle de Santa Clara. Ka kan kalaki de tunal nemi ne tejtepet intukey Santa Cruz Mountians, wan ka kan kisa ne tunal nemi ne tejtepet intukey Diablo Range. San Martín nemi intzalan ne techan Morgan Hill wan ne techan Gilroy. Tikishmatit San Martín ika nemi tik ne kojtan. Tik San Martín nemi miak tapishkal, wan nusan tuijikniwan kinpishkat ne shujshukumekat pal kichiwat ne winoj. Wan nusan tik San Martín nemi miak wey kajkal wan ini kajkal sujsul ipatiw.

Ne techan San Martín.

Icasoj

Se takat itukey Martin Murphy Jr. kitukeytih ne kojtantechan “San Martín” ika kinekik kitakamati se santo itukey San Martín de Tours. San Martín de Tours ne santo patron pal ne Valle de Santa Clara. Ne tajtzin Martin Murphy Jr. se ipatiw takat pal icasoj ne kojtantechan San Martín ika yaja ajsik Califonia keman México itekuyu ne California kenhayuk. Wan nusan kikalchiwki ne achtu tiupan tik ne Valle de Santa Clara.

An tunal, tik ne shiwit ume shikipil nawi (2004) ne SanMartínchanejket kinekituyat San Martín ma nemi se techan, pero ika se kojtantechan sujsul chikitikchin anka ne SanMartínchanejket tesu weliskiat tashtawat pal ma kiketzakan ne kupajsul, ma kinhekchiwakan ne ujujti, ma kinchiwakan tajtamachtiluyan wan ma nemi at tik ne ikajkal tuijikniwan. Ne SanMartínchanejket nusan kishkejketzatiwit musenputzat iwan ne techan Morgan Hill.

Tachia ne tunal tik ne techan San Martín.

Ken nemi ka ikajku

San Martín nemi inawak ne wey puyek at Pácifico wan yajika ishtikaya tachia ne tunal. Ka tunalku, ne itutunka ne tunal sujsul galanchin wan kemanian kichiwa 32.3 °C, wan kajka tayua ne mishti ipal ne wey puyek at pashalua wan ajsik San Martín wan puliwi kajka peyna. Ka shupan chupi sesek, pero siujsiujti tachia ne tunal wan siujsiujti yuwaki, wan kemania kichiwa 0.9°C. Ka shupan wetzi at pero tesu miak, wan te keman wetzi ichkat.

Tuijikniwan kipanultiat ne ujti.

Ne tuijikniwan

Tik ne shiwit ume shikipil majtakti (2010) ne Estados Unidos kinpua katka ne tuijikniwan, wan tik San Martín nemituya chikume shikipil se pual chikume (7,027) SanMartpinchanejket. Yey pual se punto chikwase porciento (61.6%) istakchichin (pero tesu hispanochanejket u latinochanejket), ume pual chikwase punto ume porciento (46.2%) hispanochanejket u latinochanejtket, te datka punto nawi porciento (0.4%) tijtiltikchichin, se porciento (1%) ijikmanchanejket, chikwase punto chikume porciento Asiachanejket, te datka punto yey (0.3%) talchin tik ne wey puyek at Pacíficochanejket, se pual nawi punto chiknawi (24.9%) seyuk wan makwil punto se (5.1%) tuijikniwan kipiyat ume u más intalyu.

Kan tikchiwat winoj.

Ken tuijikniwan tekitit

Tik San Martín nemi miak tapishkal wan sejse tuijikniwan kipishkat ne ajo, sejse kinpishkat ne kujkunanakat, was sejse kinpishkat ne shujshukumekat pal kichiwat ne winoj.