Octavia E. Butler

Octavia Estelle Butler kaj tiktukeytiaj Octavia E. Butler. Yaja nesik se tunal se pual ume pal ne metzti chikwasen tik ne shiwit se shikipil chiknawi tzunti ume pual chikume (1947), tik ne techan Passadena, tik California se takutun ipal Estados Unidos. Yaja mikik se tunal se pual nawi pal ne metzti ume tik ne shiwit ume shikipil chiwkwasen (2006).

Yaja se tamawawasuani.

Ne itunal ichtaka

Ne inan itukey katka Octavia Margaret Guy. Ne inan tapupuani^[1]. Ne iteku itukey katka Laurice James Butler. Ne ituku kippua kajkakti. Ne iteku mikik keman Octavia kipia chikume shiwit. Ne inan wan ne inoya kiskaliat Octavia katka.

Ne inan maya kipia se ikunew katka. Yaja yawi iwan ne inan tik ne itekiw katka. Yejemet nemi pal kalaki tik ne inchan ne istak tuijikniwan^[2] tik ne itenzajka ipal ne ichan katka. Ne tajtatuktianimet tesu yejyejka iwan ne inan Octavia katka.

Keman Octavia siwapil, yaja tesu kipia ichajchakuwan katka. Ne tamachtiluyan uej pal Octavia katka. Ne ujukseuk sijsiwapil wan pijpipil tesu yejyejka iwan Octavia katka, yajika yaja kimati ka yaja lejlenpu, tzupulujtuk wan tesu galanchin katka. Kunij, yaja yawi tik ne kalamachti senpa wan uksenpa wan yaja tamawawasua tik yaja “tumak kuchiltik amachti” katka.

Octavia pewa tamawawasua keman yaja kipia majtakti shiwit katka. Keman yaja kipia majtakti yey shiwit ne ikaw inan Hazel kilwia katka: "Nuyuluchin, ne tiltikchin tesu muchiwa tamawawasuani", melka, yaja muyulmaka pal tamawawasua ukchupi katka.

Octavia yawi tik ne Passadena City wey tamachtiluyan ka tayua ika yaja tekiti ka peyna wan ka tiutak katka. Tik ne achtu shiwit tik se wey tamactiluyan yaja tamawawasua ne chikitik casoj katka wan ne icasoj yajki ne achtu wan yajika ne wey tamachhtiluyan kitakulia ne tumin Octavia.

Octavia tesu kipia ipilawan wan yaja tesu munamimiktia katka.

Tay kichiwki

Octavia igustuj kipia itekiw ka kiajkaka tamawawasua katka. Yaja muketza ka ume u yey ka tapuyawa pal tamawawasua icajcasoj. Tik se tamachtilis tik ne Writer´s Guild of American West, Octavia kismati ne tamawawasuani Harlan Ellison katka. Yaja yultaketza ne icajcasoj sujsul yek katka. Yaja kilwia Octavia ka yaja yawi tik ne tamachtilis tik Clarion Science Fiction Writer´s Workshop tik Pennsylvania katka. Octavia kinamaka ne icasoj “Childfinder” wan ne icasoj “Crossover” katka.

Octavia tekiti makwil shiwit tik ne cajcasoj ka kitukeytia “The Patternist Series” katka. Tik ne shiwit se shikipil chiknawi tzunti yeypual chikwey (1978) yaja weli tekiti maya ken se tamawawasuani katka.

Yaja muchiwa se wey tamawawasuani tik ne shiwit se shikipil chiknawi tzunti nawi pual nawi (1984) keman yaja icasoj kipia ne Hugo Award takulis wan ne nemanha shiwit ne icasoj “Bloodchild” kipia ne Hugo Award, Locus Award, Science Fiction Chronicle Reader Award tajtakulis katka.

Ne itekiw

Octavia E. Butler kintamawawasua miak icajcasoj wan iamachti katka:

Childfinder
Bloodchild and other Stories.

Patternist series
Kindred
Speech Sounds
The Parable Series
Amnesty

The Book of Martha
Fledgeling

Ken mikik

Ipanpa ne ipajti pal ne iyulu, Octavia kiyulmati tamawawasua uej wan yaya iyulu chuka^[3] katka. Yaja mikik tik Lake forest Park tik Washington. Yaja mikik ika ne itzuntishyu tesu kipia iesyu^[4] katka, melka, seki ina yaja mikik ipanpa yaja wetzi katka.